Акафисты святым

Акафист святому великомученику Георгию Победоносцу

Кондак 1

Возбранному воеводе и победоносцу Георгию составим похвалу, яко ходатаю нашему и скорому помощнику: ты же святой великомучениче, яко имеяй дерзновение ко Господу, от всяких нас бед свободи, да зовем ти: Радуйся Георгие, великий победоносче.

Икос 1

Ангелов Творец и всея твари содетель, явивый тя Церкви Своей веры поборника, и за веру непобедимаго страстотерпца, внушает нам, за подвиги страданий твоих восхваляти тя, святе Георгие, сице: Радуйся, до конца Иисуса Сына Божия возлюбивый; радуйся, за имя Его с любовию душу свою положивый. Радуйся, исповедниче от Бога призванный; радуйся, подвижниче Божиею благодатию прославленный. Радуйся, ангелов сожителю; радуйся, пророков равностоятелю. Радуйся, Георгие, великий победоносче.

Кондак 2

Видя гонение нечестивых на христианы, не убоялся еси козни их и мучительства, богомудре, но яко добрый воин Христов, вся своя нищим раздав, волею потекл еси на совет их неправедный, Христу вождю и Богу своему поя: Аллилуиа.

Икос 2

Разумно уразумев единаго Бога, в триех Ипостасех боголепно покланяемаго, твердым умом исповедал еси Его, на соборищи нечестивых, и тако обличил еси безумнаго царя безумное поклонение твари. Сего ради за твое высокое любомудрие приими от нас, Георгие, усердныя похвалы: Радуйся, единаго истиннаго Бога проповедниче; радуйся, Пресвятая Троицы верный защитниче. Радуйся, велию православного исповедания тайну неверным показавый; радуйся, идольскаго служения прелесть обличивый. Радуйся, риторе божественный; радуйся, витие премудрости исполненный. Радуйся, Георгие, великий победоносче.

Кондак 3

Сила Божия просвещающая всякаго человека грядущаго в мир, и в темнице тя страждущаго посетила есть, смиренномудро Георгие: понеже ты вся жития сего тленная яко уметы презрев, единому Христу прилепился еси, да за имя Его добре воинствовав, сподобишися тому со ангелы вечно воспевати: Аллилуиа.

Икос 3

Имея ум и сердце Духом Святым озаренныя, ты по внушению Его поревновал еси подвизатися за имя Христово, до крове стоя бо мужественно в вере, обличил еси вознесенную нечестиваго соборища гордыню. Сего ради хвалим тя, всемудре Георгие, сице: радуйся, щите воздвигнутый на охранение благочестия; радуйся, мечу подъятый на посечение нечестия. Радуйся, столпе веры; радуйся, стено и утверждение Христовы Церкви. Радуйся, верных удобрение; радуйся, неверных страх и посрамление. Радуйся, Георгие, великий победоносче.

Кондак 4

Безумный мучитель дышущий на тя убийством, страстотерпче Георгие, жаждал бо крове твоея яко пес алчный, повелевая распяти на колесе тело твое, и злейшим мукам предати: ты же, возмогая о Господе, с твердым упованием к Богу взывал еси: Аллилуиа.

Икос 4

Слышавше от тебе Диоклитиан и жрецы идольстии словеса премудрости, распыхахуся на тя злобою, паче же егда рекл еси: “О царю мучителю! Почто мя всуе истязуеши, мне бо еже жити Христос, и еже умрети приобретение. Трудно ти есть против рожна прати”. Сего ради мы взываем ти, великоимените Георгие, сице: Радуйся, за мужественное исповедание веры на колесе кровь свою пролиявый; радуйся, кровию своею торжество веры возвеличивый. Радуйся, апостолов соревнителю; радуйся, вольным Христовым страстем подражателю. Радуйся, поборниче веры непоколебимый; радуйся, страстотерпче адаманта твердейший. Радуйся, Георгие, великий победоносче.

Кондак 5

Боготечной звезде подобен был еси Георгие, чудесным бо от ангела исцелением и видимым от колеса отрешением, научил еси неверных веровати в Троицу Единосущную, и Той купно с тобою воспевати: Аллилуиа.

Икос 5

Видеша народи чудеса силы Божия, яве на тебе бываемыя, с кротостию учение Христово от тебе прияша и возопиша глаголюще: воистинну велик Бог христианский! Сего ради и мы восхваляя тя, достославне Георгие, взываем сице: Радуйся, светоносным спасения словом, тьму неверия разгнавый; радуйся, мученическим веры исповеданием, неверныя ко Христу обративый. Радуйся, легионы воин земных, в небесное воинство преводяй; радуйся, яко воин Христов, с небесными вои пребываяй. Радуйся, ратоборцев славо; радуйся, пресветлаго мученическаго лика красото. Радуйся, Георгие, великий победоносче.

Кондак 6

Проповедником истины, духоносным апостолом поревновав, крестом миру распялся еси страстотерпче: се бо яко Иона во чрево китово, в пещь нерастворенныя извести стремглав ввержен был еси, да прославится тебе ради дивный во святых Господь, Емуже ты и в рове известнем, яко во храме славы, умно взывал еси: Аллилуиа.

Икос 6

Воссиявый в тридневном Своем от гроба востании, всесильный ада и смерти Победитель Иисус, спасе тя от адова истления, страстотерпче Георгие: по триех бо днех обретоша тя в извести жива, и в воздеянии рук поюща Бога: сего ради вельми пристрашни быша и ужасошася. Мы же радующеся, восписуем ти победную песню: Радуйся, позорным в известный ров низвержением, вознесенную диавола гордыню низложивый; радуйся, дивным от Бога спасением, зверство мучителя победивый. Радуйся, яко незлобив сый, за творивших ти напасть молился еси, яко за благотворцев; радуйся, яко о обращении их, якоже Павел о евреех, болезновал еси. Радуйся, мужу желаний; радуйся, сосуде избранный. Радуйся, Георгие, великий победоносче.

Кондак 7

Хотя всячески уловити сердце твое к прелести идол, нечестивый мучитель умышляет прельстити тя волшебными чаровании: ты же богоизбранне с Давидом восклицая: о Бозе спасение мое и слава моя, верно Тому пел еси: Аллилуиа.

Икос 7

Новое показа зло лукавый оный сатаны служитель Диоклитиан, егда в безумной своей ко идолом ревности, повеле напоити тя, Георгие, ядом: ты же исполнен сый веры и упования, аще и смертное испил, обаче без вреда пребыл еси, богохвальне, темже и мы вопием ти: Радуйся, яко в уповании на Бога жива не посрамился еси; радуйся, яко мучителя ни во чтоже вменил еси. Радуйся, бесов отгнателю; радуйся, волшебный козни разрушителю. Радуйся, яко тобою дивен Бог во святых своих является; радуйся, яко тобою благочестно имя Христово прославляется. Радуйся Георгие, великий победоносче.

Кондак 8

Странный и страшный совет бысть от некоего волхва нечестивому царю, да повелит ти, в доказательство правости веры Христовой, словом воскресити мертваго: ты же, Георгие, ничтоже сумняся, воспевал еси Тому, Иже несть Бог мертвых, но Бог живых: Аллилуиа.

Икос 8

Всежеланный и Сладчайший Иисус, Егоже ты всею душею и всем сердцем возлюбил еси, всеблаженне Георгие, слыша теплое веры твоея моление, вскоре повеле по слову твоему воскреснут мертвому, прославления ради имени Своего, и верных утверждения, неверным же и ослепленным на удивление и богопознание. Сего ради по долгу вопием ти: Радуйся, яко Господь Сил дивная на тебе явил есть; радуйся, яко тобою мертваго от гроба воскресил есть. Радуйся, ослепленному волхву умное веры прозрение даровавый; радуйся, многим, Христа ради пострадавшим, во святая святых путь показавый. Радуйся, Рима удивление; радуйся, христианскаго рода возвышение. Радуйся, Георгие, великий победоносче.

Кондак 9

Вси ангели восхвалиша Бога, даровавшаго ти таковое мужество, Георгие, яко и в темничном заточении не преставал еси молитвенно бодрствовать. Сего ради яко великий таинник Божия благодати, удостоился еси видети в видении Господа, венцем нетления главу твою венчающа, да и мы с тобою вопием: Аллилуиа.

Икос 9

Ветии многовещаннии риторекими своими языки не возмогут изрещи тебе достойныя хвалы, Георгие, многих ради твоих подвигов и болезней, ихже за Христа и Церковь подъял еси волею. Сего ради и мы, недоумея восхваляти тя по достоянию, воспеваем сице: Радуйся, вольным за Христа и Церковь страданием, ветхаго в себе Адама распявый; радуйся, за доблестное страдание, венец правды от руки Господни приявый. Радуйся, правило ревности благочестивыя; радуйся, образе нищеты духовныя. Радуйся, яко не себе, но единому Христу добре угодил еси; радуйся, яко за Христа на многообразныя смерти готов был еси. Радуйся, Георгие, великий победоносче.

Кондак 10

Спасти хотя души во тьме идолослуждения погибающих, боголюбче Георгие, ты, ревнуя, поревновал еси яко Илия по Бозе: вшед бо во храм идольский, силою Божиею разгнал еси бесы, сокрушил идолы, посрамил жрецы, и, яко победитель, не с человеки, но со ангелы пел еси Богу: Аллилуиа.

Икос 10

Стены безчувственнее окамененный сердцем мучитель твой, Георгие, не уразуме Бога, яве тобою чудодействующа, но до конца пребыл есть, яко аспид, затыкаяй уши свои. Сего ради повеле усещи тя на позорищи во главу, яко злодея: ты же, болезнуя о погибели души его, радостно приял еси кончину, за нюже мы тя ублажаем любовию сице: Радуйся, веру, надежду и любы до конца сохранивый; радуйся, во успении твоем многия и великия чудеса сотворивый. Радуйся, оружием благоволения Божия венчанный на земли; радуйся, славою и велелепием украшенный на Небеси. Радуйся, человече Божий; радуйся, добрый воине Христов. Радуйся, Георгие, великий победоносче.

Кондак 11

Пение Пресвятой Троице паче иных воздал еси, святый великомучениче Георгие, не словом точию и умом, но живым всего себя в жертву принесением: подражая бо распятому за ны, непорочному Агнцу Христу, положил еси душу свою за други своя волею. Темже убо аще и недовольни есмы к похвалению таковыя твоея доблести, больше бо сея любве никтоже имать, обаче благодарни суще, поем дивному во святых: Аллилуиа.

Икос 11

Светоприемный светильник истиннаго Света, сущим на земли являешися богоизбранне Георгие, просвещаеши бо сердца верных, и к разуму Божественному вся наставляеши, поучая и нас весело взывати: Радуйся, яко в пресветлых ангельских чертозех вселяешися; радуйся, яко не в гадании, но лицем к лицу, невечерняго Троическаго Света причащаешися. Радуйся, нищих питателю и обидимых защитниче; радуйся, немощных врачу и царей поборниче. Радуйся, православным воином во бранех поборниче; радуйся, о спасении грешников теплый ходатаю. Радуйся, Георгие, великий победоносче.

Кондак 12

Благодать, данную ти от Бога, ведуще, память твою празднуем, великомученице Георгие, и с усердным молением к чудотворному образу твоему притекающе, твоею всесильною о Господе помощию, яко необоримою стеною, ограждаемся. Сего ради восхваляя тя, усердно зовем Богу: Аллилуиа.

Икос 12

Славную кончину твою поюще, еюже возвеличился еси яко добрый воин Христов, молим тя, страстотерпче Георгие: буди нам во всем ко благу помощниче, и услыши ны, усердно взывающих ти: Радуйся, яко тобою Церковь верных просвещается; радуйся, яко имя твое и между неверными прославляется. Радуйся, дивная исповедников славо; радуйся, высокая мучеников похвало. Радуйся, телес наших целебниче; радуйся, о душах наших молитвенниче. Радуйся, Георгие, великий победоносче.

Кондак 13

О всеблаженный и святый великомучениче Георгие, приими сие наше хвалебное пение, и избави нас от всякаго зла твоим теплым к Богу ходатайством, да с тобою воспеваем: Аллилуиа.

(Этот кондак читается трижды, затем икос 1 и кондак 1)

Молитвы святому великомученику Георгию Победоносцу

Молитва первая

О всехвальный, святый великомучениче и чудотворче Георгие! Призри на ны скорою твоею помощию, и умоли Человеколюбца Бога, да не осудит нас, грешных, по беззакониям нашим, но да сотворит с нами по велицей Своей милости. Не презри моления нашего, но испроси нам у Христа Бога нашего тихое и богоугодное житие, здравие же душевное и телесное, земли плодородие, и во всем изобилие, и да не во зло обратим благая, даруемая нам тобою от Всещедраго Бога, но во славу святаго имени Его и в прославление крепкаго твоего заступления, да подаст Он стране нашей и всему боголюбивому воинству на супостаты одоление и да укрепит непременяемым миром и благословением. Изряднее же да оградит нас святых ангел Своих ополчением, во еже избавитися нам, по исходе нашем из жития сего, от козней лукаваго и тяжких воздушных мытарств его, и неосужденным предстати Престолу Господа Славы. Услыши ны, страстотерпче Христов Георгие, и моли за ны непрестанно Триипостаснаго Владыку всех Бога, да благодатию Его и человеколюбием, твоею же помощию и заступлением обрящем милость, со ангелы и архангелы и всеми святыми одесную Правосудного Судии стати, и Того выну славити со Отцем и Святым Духом, ныне и присно, и во веки веков. Аминь.

Молитва вторая

Святый, славный и всехвальный великомучениче Георгие! Собраннии во храме твоем и пред иконою твоею святою поклоняющиися людие, молим тя, известный желания нашего ходатаю, моли с нами и о нас умоляемаго от своего благоутробия Бога, да милостивно услышит нас, просящих Его благостыню, и не оставит вся наша ко спасению и житию нуждная прошения, и дарует стране нашей победу на сопротивныя; и паки, припадающе, молим тя, святый победоносче: укрепи данною тебе благодатию во бранех православное воинство, разруши силы востающих врагов, да постыдятся и посрамятся, и дерзость их да сокрушится, и да уведят, яко мы имеем Божественную помощь, и всем, в скорби и обстоянии сущим, многомощное яви свое заступление. Умоли Господа Бога, всея твари Создателя, избавити нас от вечнаго мучения, да прославляем Отца, и Сына, и Святаго Духа и твое исповедуем предстательство ныне, и присно, и во веки веков. Аминь.

Тропарь великомученику Георгию Победоносцу

Тропарь, глас 4

Подвигом добрым подвизался еси, страстотерпче Христов Георгие, и веры ради обличил еси мучителей нечестие: жертва же благоприятна Богови принеслся еси. Темже и венец приял еси победы, и молитвами, святе, твоими, всем подаеши прегрешений прощение.

Ин тропарь, глас той же

Яко пленных свободитель, и нищих защититель, немощствующих врач, царей поборниче, победоносче великомучениче Георгие, моли Христа Бога, спастися душам нашим.

Кондак, глас 4

Возделан от Бога, показался еси благочестия делатель честнейший, добродетелей рукояти собрав себе: сеяв бо в слезах, веселием жнеши: страдальчествовав же кровию, Христа приял еси: и молитвами, святе, твоими, всем подаеши прегрешений прощение.

Акафист святому праведному Иоанну пресвитеру Кронштадтскому, чудотворцу

Кондак 1

Избраннаго и вернаго во иереех Божиих восхваляем тя, богоносне отче Иоанне! Ты бо Евангельской Истине последуя, Христу всем сердцем сораспялся еси, струю чудес и исцелений всем верным источаеши и ко спасению их направляеши. Мы же молитвами твоими в вере, надежде и любви укрепляеми, благодарне зовем ти: Радуйся, Иоанне, земли Российския молитвенниче предивный.

Икос 1

Ангела молитвы и проповедника покаяния ведаем тя, блаженне отче. Ходатайствуеши бо за нас у Престола Божия, да в разум истинный приидем и жизнь свою на путь спасения направим, взывая тебе: Радуйся, благодати Божия сосуде избранный; Радуйся, Премудрость Божию, яко млеко матере, сладостно впитавый; Радуйся, Ангелу хранителю твоему, яко Товия древле, вседушевне последовавый; Радуйся, боголюбивых родителей целомудренный плод чистоты непререкаемый; Радуйся, в повиновении родителям своим благословение Божие стяжавый; Радуйся, от юности твоея водительству Духа Святаго прилежавый; Радуйся, всем сердцем твоим Бога возлюбивый; Радуйся, в меру возраста Христова Богомудренно возраставый; Радуйся, Иоанне, земли Российския молитвенниче предивный.

Кондак 2

Предвидя, яко многия беды и соблазны грядут на Церковь Русскую и чада Божии в смятении будут, яко пастырь добрый, душу свою за паству свою готовый положити, глаголал еси людям: "Убойтесь соблазнов, стойте в вере Православной, мужайтесь и крепитесь, и славьте Господа, взывая Ему: Аллилуиа".

Икос 2

Разумом Божественным просвещаемый, богословия струи животочныя источил еси, всеблаженне отче Иоанне, в посте и молитве словеса Божия со слезами в сердца верных сея, к свету истиннаго Богопознания чад земли нашея призывал еси. Тии же, в любви Божии укрепляющеся, пояху тебе таковая: Радуйся, Евангельския Истины пламенный ревнителю; Радуйся, глаголов жизни вечныя неумолкаемый возвестителю; Радуйся, равноангельным житием твоим достойно украшенный; Радуйся, у Престола Божия о людях ходатаю верный; Радуйся, от юности Церкви Христовой всем сердцем прилепивыйся; Радуйся, Христу сораспятися о людях вседушевне возгоревыйся; Радуйся, любовию Христовою сердце твое, аки ниву благоплодную, возделавай; Радуйся, людям, в скорбех и печалех изнемогшим, состраданием и молитвою облегчение подававый; Радуйся, Иоанне, земли Российския молитвенниче предивный.

Кондак 3

Силою Божественныя благодати, яко углем горящим у жертвенника Божия возжжен, светильниче многосветлый во граде Кронштадте просиял еси, отцев наших похвало, отче Иоанне. Сице бо во тьме греховней обураемых и соблазном богоборчества колеблемых зарею Божественнаго разума просветил еси и научил еси пети: Аллилуиа.

Икос 3

Имея любовь велию людем, Кровию Сына Божия искупленным, потекл еси к неимущим благочестия, трезвения и страха Божия и отчаянием обуреваемым, пастырю добрый Иоанне, сих же кротостию и смиренномудрием покорив Христу, научил еси благодарно взывати тебе таковая: Радуйся, сущих во тьме и сени смертной премудрый просветителю; Радуйся, о спасении людей, в пучине греховней обуреваемых, благостный попечителю; Радуйся, неведущих Бога и окамененных сердцем к покаянию пробуждаяй; Радуйся, Божественною премудростию в писаниях твоих нас озаряяй; Радуйся, сердец строптивых и злонравных благостное умягчение; Радуйся, ленивых и коснеющих совестию щедролюбивое обличение; Радуйся, Слова Божия и правды Его проповедниче неустрашимый; Радуйся, Иоанне, земли Российския молитвенниче предивный.

Кондак 4

Бурю злонравия воздвизаему на Церковь нашу Святую ведал еси, отче Иоанне, яко верный страж дома Господня, научал еси овцы Христовы бдети и право ходити в истинней вере и в заповедях Господних непорочно пребывати, да чистым сердцем и устами непристанно взывают к Богу победную песнь: Аллилуиа.

Икос 4

Слышаще о тебе, яко ты еси сосуд избранный и благодатных даров преисполненный, подвигов милосердия и нищелюбия ревнитель, вдов сирот, страждущих и обремененных утешитель и о нераскаянных грешницех молитвенник слезный, не токмо от Кронштадта, но и от всех конец земли потекоша к тебе людие Божии, исцеления от тебе получаху. С ними же и мы гресех своих кающеся, яко ходатаю о нас пред Богом теплу, умильно зовем ти: Радуйся, сеятелю правды, слезами твоими землю нашу освятивый; Радуйся, обличителю неправды, души верных от прелести греховныя свободивый; Радуйся, свете сердец кротких и разумных, путь к Богу указуяй; Радуйся, ученьми твоими, яко кормилица кроткая нас греяй и питай; Радуйся, всех скорбящих и обремененых неложное упование; Радуйся, болящих и от духов злых страждущих благодатное врачевание; Радуйся, сосуде избранный, дары Духа Святого туне верным источивый; Радуйся, не о людях токмо, но и о скотех милосердовавый; Радуйся, Иоанне, земли Российския молитвенниче предивный.

Кондак 5

Яко небосветлая звезда священнолепным житием твоим просиял еси, пастырю Христов Иоанне! Богом дарованное тебе наследие от волков, губящих е, словом Божиим ограждал еси, пастырски взывая: возьмите Крест Господень, на Немже Христос — Царь славы — рукописание грехов наших изглади, в Нем же миру востание во веки. Мы же, сим знаменающеся, поем с тобою Бога победную песнь: Аллилуиа.

Икос 5

Видевше тя Российствии людие дивно на свещнице церковной сияюща, правды Божия ищуще, к тебе притекаху, и яко другу Христову, исповедаху грехи своя. Мы же, обремененнии многими прегрешениями, к тебе, блаженне Иоанне, прибегаем и тако глаголем: Радуйся, яко силою благодати, яже в тебе, немощнии духом в любви Божии укрепляются; Радуйся, яко твоими молитвами кающиеся плена греховнаго свобождаются; Радуйся, яко труды твоими алчущии и жаждущии Правды Христовой насыщаются; Радуйся, яко благовестием твоим врази Христовы посрамляются; Радуйся, яко молитвами твоими силы ада содрагаются; Радуйся, яко воздеянием рук твоих врата небесная верным отверзаются; Радуйся, в умилостивление за народ наш молитву, яко кадило благовонное, херувимски Богу приносивый; Радуйся, за неведующих правды и любве Божия молитися нас подвигнувый; Радуйся, Иоанне, земли Российския молитвенниче предивный.

Кондак 6

Проповедницы чудных деяний твоих, блаженне Иоанне, явишася мнози: богатии и нищии, старцы и юноши. Ты бо всем Любовь свою изливал еси. Темже не токмо провославнии, но и иноверии силою молитв твоих милость Божию обретаху, поя Богу: Аллилуиа.

Икос 6

Возсиял еси житием твоим в Церкви Православней лучезарнее сияния севернаго, светом Евангелия Христова Отечество наше просвещал и от сетей вражиих чада ея ограждал. Тем же и ныне молим Господа сил, да любовь святая утвердится в сердцах наших, во еже ни скорбь, ни теснота, ни смерть не возмогут нас разлучить от любви Божия. И тако достигше сего, тебе воззовем: Радуйся, яко Божиим смирением грядущая на ны предвозвестивый; Радуйся, тесным путем в заповедях Божиих ходити нас научивый; Радуйся, в скорбех и печалех сущим источник радости в Бозе указавый; Радуйся, оную радость, яко зеницу ока, свято хранити нам завещавый; Радуйся, десницею и щуйцею оружие Правды Божия содержаяй; Радуйся, в словесе истины и любви нелицемерней Сыну Громову уподобивыйся; Радуйся, порфирою покаяния всех облекаяй; Радуйся, диадимою благодати славно увенчанный; Радуйся, Иоанне, земли Российския молитвенниче предивный.

Кондак 7

Хотя Всеблагий Господь спасти люди земли нашея и, яко злато в горниле огненнем, очистити я, вложи в уста твоя, всеблаженне, дух премудрости и разум провидца, во еже чрез покаяние сердечное и сокрушение слезное преуготовати я в вере непоколебимых к жертвенному служению, да со всеми святыми, в земле Российстей просиявшими, ангельски вопиют Богу: Аллилуиа.

Икос 7

Новаго избранника Божия, всеблаженне Иоанне, видяще тя у Алтаря Господня за всех молитвою слезною Христу сраспинающаяся, боголюбивии людие с верою к тебе притекаху и душевне и телесне исцеляхуся. Темже и мы, в немощи сущии, молим тя прилежно: воздвигни руце твои и не премолчи за ны ко Господу, якоже отец о чадех своих, да умножит Господь милость Свою на нас, приносящих ти сицевая: Радуйся, у Престола Божия прилежный о нас печальниче и ходатаю; Радуйся, покаяния слезнаго усердный глашатаю; Радуйся, образе неусыпнаго делания, Христу Богу работати прилежно нас наставляеши; Радуйся, яко на божественней страже веры апостольския стояти нас утверждаеши; Радуйся, образ воздержания и целомудрия добре показавый; Радуйся, суеверия, ереси и злохуления от стада твоего отсекавый; Радуйся, сущих во тьме неведения славный просветителю; Радуйся, душ человеческих от суеты житейския мудрый восхитителю; Радуйся, Иоанне, земли Российския молитвенниче предивный.

Кондак 8

Странное чудо видим на тебе, предивный пастырю Христов Иоанне! Сама бо Пречистая Матерь Божия ублажити тя и последующих тебе и с радости благоволение Божие всем возвести: о милейшия вы чада, Отца Небеснаго! Сице бо радость Церкви Небесныя о подвизе земныя предвозвести. Сего ради мы, надеждою на предстательство о нас Матери Господа Сил согреваеми, вопием Царю всех веков: Аллилуиа.

Икос 8

Весь желанием Божием распаляемь, носитель любви Христовы явился еси, пастырю добрый. В ней бо милость и истина сретостеся, правда и мир облобызастася; всякая же лесть упразднися, еретическое же злонравие, яко тля, попалися, скорби же человеческая елеем милосердия твоего утолишася. Мы же, нерадивии, сокровищ сих не стяжахом, праведным судом Божиим многим скорбем и печалем достойни явихомся. Но, ведуща тя помощника неусыпна, умильно зовем ти: Радуйся, любве Христовой неутомимый носителю; Радуйся, мира и правды ревностный сеятелю; Радуйся, веры православныя незыблемый хранителю; Радуйся, благочестия и добронравия насадителю; Радуйся, о всем мире печальниче и слезный молитвенниче; Радуйся, Церкви Христовой немеркнущий светильниче; Радуйся, отцев наших похвало, нам же надеждо и утешение; Радуйся, Богоизбранный пастырю, Святыя Руси благодатное украшение; Радуйся, Иоанне, земли Российския молитвенниче предивный.

Кондак 9

Всем сущим в бедах и скорбех житейских воздвиже Господь на радость пастыря и чудотворца предивна Иоанна, да хромыя и расслабленныя, слепыя и от духов злых томимыя исцелит, в пагубнем пиянстве и супружестей неверности растлеваемыя к непостыдней жизни призовет, а яже во озлоблении сущия к Богу приведет и сице в душах верных царство Правды Божия насадит, да воспоем вси спасительную песнь Богу: Аллилуиа.

Икос 9

Вития многовещании недоумеют изъясняти силу молитвы твоя, Иоанне предивне, егда три юноши, дерзнувших поглумитися о тебе и молитве твоей, спасительне наказал еси. Узрев же я кающихся и слезно молящихся, исцеление злохулителю от Бога испросил еси. Тии же, познавше молитвы твоея силу чудодейственную и любве твоея милосердие теплейшее, яко Божия провидица, ублажиша тя похвалами таковыми: Радуйся, благое икономство чина своего богомудренно соблюдый; Радуйся, данный тебе залог, Тело Христово, цел и невредим до последнего твоего издыхания сохранивый; Радуйся, скрижали Богоначертынныя обою Заветов достойне возвестивый; Радуйся, Церковь Христову благочестием пастыря добра прославивый; Радуйся, истиннаго просвещения и христианскаго благочестия ревностный насадителю; Радуйся, кающихся грешников, сирых и убогих милостивый покровителю; Радуйся, мудрый путеводителю, стези правды юным указуяй; Радуйся, судие нелицеприятный, зломудрствующия любовию наказуяй; Радуйся, Иоанне, земли Российския молитвенниче предивный.

Кондак 10

Спасти хотя души ближних своих, ересьми и маловерием обуреваемыя, противу кознем диавольским воздержанием и смирением вооружился еси, отче Иоанне, апостольское и святоотеческое веры исповедание твердо сохранив. Жертвенною же любовию Христу сраспинайся, душу твою за спасение народа Божия положив, Царствия Небеснаго достигл еси, идеже со Ангелы и лики святых непрестанно Бога Славословия, поминай нас, славную память твою празднующих и поющих Богу: Аллилуиа.

Икос 10

Стена твердая бысть любовь твоя ко Господу, в ней же утвердися сердце твое, богоносне, отче Иоанне. Сего ради всем притекающим к тебе с верою прибежище и утверждение явился еси, да всяческая Христу приобрящеши. Темже и нам, к тебе припадающим, буди стена крепка и ограждение непреодолимое, да не посмеются о нас, хотящия нам злая, во еже в мире и любве Христове пребывати и приносити сия похвалы: Радуйся, святильниче неугасимый, огнем Духа Святого возжженный; Радуйся, крине, присно благоухаяй, росою благодати Божия напоенный; Радуйся, росо сладкоплодная, благодатными дары верных ожитворяющая; Радуйся, соле земли, от греховнаго тления нас сохраняющая; Радуйся, в мире житейском обуреваемым тихое пристанище; Радуйся, яко душевне и телесне изенемогающим о помощи Божией умоляеши; Радуйся, сердцеведче предивне, верныя от лжемудрствования ограждаяй; Радуйся, силою молитвы чистыя союз супружеския верности укрепляй; Радуйся, Иоанне, земли Российския молитвенниче предивный.

Кондак 11

Песнь достохвальную приносим ти, всеблаженне отче Иоанне, всем житием твоим прославившему Бога. И якоже видехом тя на земли долу у Престола Господня за всех и за вся Владыку мира умолявшаго, сице и ныне на Небеси горе вознеси молитвы твоя, во еже непоколебимей быти Церкви нашей, да из рода в род в отечестве нашем благочестно славится Имя Триединаго Бога поющими Ему: Аллилуиа.

Икос 11

Светозарную свещу, во мраце жития сущим, зрим тя, Богом избранне отче Иоанне, ты бо на Небесех у Престола Божия в сонме святых и Сил Небесных о нас присно ходатайствуеши, воззри на нас, чад твоих, облегчи наша скорби и исцели наша недуги, да зовем ти: Радуйся, яко в подвизе твоем имя Пресвятыя Троицы дивно прославися; Радуйся, яко благочестием веры твоея Церковь Христова украсися; Радуйся, яко состраданием к ближним твоим скорби и болезни, и печали всяческия утоляются; Радуйся, яко молитвами твоими кающиися грешницы Царствию Небесному приуготовляются; Радуйся, спасительных благ земных и небесных щедрый подателю; Радуйся, от враг видимых и невидимых надежный избавителю; Радуйся, яко в земном Едеме, Церкви Христовой, подвигом добрым просиял еси; Радуйся, яко доброты райская, уготованная праведным, восприял еси; Радуйся, Иоанне, земли Российския молитвенниче предивный.

Кондак 12

Благодатных даров Духа Святого кладезь преполненный яви в тебе Господь, отче наш Иоанне, да с тобою и мы сих причастницы будем и тако познаем милость Божию к нам, яко не отступит, ниже посрамит нас Господь, егда благодарными усты и чистым сердцем, уповающе на милость благоутробия Его, воспоем Ему: Аллилуиа.

Икос 12

Поюще твое достохвальное житие на земли и славу, юже стяжал еси на Небеси, молим тя, блаженне Иоанне, вознеси о нас молитвы Богу, да помиловани будем в день судный и, спасаеми твоими молитвами, тако тебе воззовем: Радуйся, богоизбранно и богопрославленне пастырю земли Российская; Радуйся, яко воспел еси имя Божие, аки орган мусикийский; Радуйся, пророком и апостолом добре поревновавый; Радуйся, бежати гнева Божия и творити плоды покаяния мудре наставивый; Радуйся, об Отечестве и народе нашем теплый молитвенниче; Радуйся, веры православный истинный исповедниче; Радуйся, пресветлый лучу, путь к жизни вечней исияваяй; Радуйся, неисчерпаемую благость Божию нам открываяй; Радуйся, трапезо неоскудеваемая, от неяже монаси и мирстии питаются; Радуйся, учителю Правды Божия, еюже старцы и юноши украшаются; Радуйся, яко ихже даде тебе Господь, сотворил еси я Богу в радование; Радуйся, яко от небожителей приял еси о Господе целование; Радуйся, Иоанне, земли Российския молитвенниче предивный.

Кондак 13

О всеблаженне отче Иоанне, всероссийский пресветлый светильниче и предивный чудотворче! Приими хвалебное сие пение и умоли Христа Бога в мире и благочестии утвердити Святую Церковь, нас же всяких бед избавити и в единомыслии веры в союзе любви Христовы соблюсти, да единеми усты и единем сердцем воспоем с тобою Богу: Аллилуиа.

(Этот кондак читается трижды, затем икос 1 и кондак 1)

Молитвы святому праведному отцу Иоанну Кронштадтскому

Молитва первая

О великий угодниче Христов, святый праведный отче Иоанне Кронштадтский, пастырю дивный, скорый помощниче и милостивый предстателю! Вознося славословие Триединому Богу, ты молитвенно взывал: Имя Тебе —любовь: не отвергни меня, заблуждающагося. Имя Тебе — Сила: укрепи меня, изнемогающего и падающаго. Имя Тебе — Свет: просвяти душу мою, омраченную житейскими страстями. Имя Тебе — Мир: умири мятущуюся душу мою. Ныне благодарная твоему предстательству всероссийская паства молится тебе: Христоименитый и праведный угодниче Божий! Любовию твоею озари нас, грешных и немощных, сподоби нас принести достойные плоды покаяния и не осужденно причащатися Христовых Таин. Силою твоею веру в нас укрепи, в молитве поддержи, недуги и болезни исцели, от напастей, врагов, видимых и невидимых, избави. Светом лика твоего служителей и предстоятелей Алтаря Христова на святые подвиги пастырского делания подвигни, младенцем воспитание даруй, юное настави, старость поддержи, святыни храмов и святые обители озари! Умири, чудотворче и провидче преизряднейший, народы страны нашея, благодатию и даром Святаго Духа избави от междуусобныя брани, расточенная собери, прельщенныя обрати и совокупи Святей Соборней и Апостольской Церкви. Милостию твоею супружества в мире и единомыслии соблюди, монашествующим в делах благих преуспеяние и благословение даруй, малодушныя утеши, страждущих от духов нечистых свободи, в нуждах и обстояниих сущих помилуй и нас на путь спасения настави. Во Христе живый, отче наш Иоанне, приведи нас к Невечернему Свету жизни вечныя, да сподобимся с тобою вечнаго блаженства, хваляще и превозносяще Бога во веки веков. Аминь.

Молитва вторая

О великий чудотворче и предивный угодниче Божий, богоносне отче Иоанне! Призри на нас и внемли благосердно молению нашему, яко великих дарований сподоби тя Господь, да ходатаем и присным молитвенником за нас будеши. Се бо страстьми греховными обуреваеми и злобою снедаеми, заповеди Божия пренебрегохом, покаяния сердечнаго и слез воздыхания не принесохом, сего ради многим скорбем и печалем достойни явихомся. Ты же, отче праведный, велие дерзновение ко Господу и сострадание к ближним своим имея, умоли Всещедраго Владыку мира, да пробавит милость Свою на нас и потерпит неправдам нашим, не погубит нас грех ради наших, но время на покаяние милостивно нам дарует. О святче Божий, помози нам веру православную непорчно соблюсти и заповеди Божии благочестно сохранити, да не обладает нами всякое беззаконие, ниже посрамится Правда Божия в неправдах наших, но да сподобимся достигнути кончины христианския, безболезненныя, непостыдныя, мирныя и Тайн Божиих причастныя. Еще молим тя, отче праведне, о еже Церкви нашей Святей до скончания века утвержденней быти, Отечеству же нашему мир и пребывание испроси и от всех зол сохрани, да тако народи наши, Богом храними, в единомыслии веры и во всяком благочестии и чистоте, в лепоте духовнаго братства, трезвении и согласии свидетельствуют: яко с нами Бог! В Нем же живем и движемся, и есмы, и прибудем во веки. Аминь.

Молитва третья

Отче Иоанне досточудне! Ты добродетельми многими к Богу приблизился еси и дарований духовных от Него сподобился еси: недуги врачевати, страсти прогоняти и скорби утоляти. Темже смиренно молим тя: подаждь недугом нашим исцеление и страстем врачевание, находящия же на нас скорби утоли и радость духовную в сердца наша всели. И помози нам подражательми быти святаго твоего жития и всех благих твоих деяний, яко да сподобимся с тобою наследия Царствия Небеснаго. Аминь.

Тропарь праведному Иоанну Кронштадтскому

Тропарь, глас 1

Православныя веры поборниче, земли Российския печальниче, пастырем правило и образе верным, покаяния и жизни во Христе проповедниче. Божественных Тайн благоговейный служителю и дерзновенный о людех молитвенниче, отче праведный Иоанне, целителю и предивный чудотворче, граду Кронштадту похвало и церкви нашея украшение, моли Всеблагаго Бога умирити мир и спасти души наша.

Кондак, глас 3

Днесь пастырь Кронштадтский предстоит Престолу Божию и усердно молит о верных Христа Пастыреначальника, обетование давшаго: “Созижду Церковь Мою и врата адова не одолеют ей”.

Акафист святому равноапостольному князю Владимиру

Кондак 1

Избранного светильника, тьму идолослужения в державе Русской разгнавшаго и светом Божественныя веры ю просветившаго, восхваляем тя, святый равноапостольный княже Владимире: ты же яко выну со дерзновением предстояй Царю царствующих, не престай моляся о достоянии твоем и твоими молитвами сохраняй нас от всяких бед и зол, да со умилением благодарственно зовем ти: Радуйся, Владимире, державы Русския просветителю.

Икос 1

Ангелом и человеком Творец, времена и лета во Своей власти положивый и судьбы государств и народов устрояяй, егда благоизволи призвати род русский от тьмы идолослужения ко свету истины и правды вечныя, постави тя, благоверный княже, благовестителя и совершителя сея всеблагия воли Своея. Темже, благодаряще Творца и Спаса нашего, славословим тя, яко великаго избранника Божия нашего ради спасения, с веселием зовуще: Радуйся, равноапостоле, ко просвещению народа русскаго Премудрым Промыслом предъизбранный; радуйся, от первозваннаго апостола на горах Киевских прореченный. Радуйся, преславный сосуде Божественныя благодати, державе твоей дарованный; радуйся, пречудный кореню, из негоже на земли нашей произрасте велие древо правоверия. Радуйся, яко тобою Имя Господне во всех пределех страны твоей прославляется; радуйся, яко и твое преславное имя от всех родов русских с любовию воспевается. Радуйся, Владимире, державы Русския просветителю.

Кондак 2

Видя суету бездушных идолов и прелесть диавола еюже уловляет темныя люди в сети беззакония, купно же слыша святых первомученик русских за Христа Феодора и юнаго Иоанна, глаголющих безбожным мучителем: “Бози ваши не суть бози, но древо, еже днесь пребывает — утро сгнило есть. Един же есть Бог Истинный, Иже сотвори Небо и землю”; тогда возгорелся еси сердцем, во еже взыскати и уведети Сего Единаго Истиннаго Бога, Емуже покланяется всяко колено Небесных, земных и преисподних, немолчно поспевая: Аллилуиа.

Икос 2

Разум всевышний приосени тя, егда предсташа ти проповедницы разновернии и потщался еси, да не уловлен будеши в сети лжеучения, но да обрящеши веру истинную и спасительную. Темже ублажаем тя: Радуйся, премудрый просветителю народа русскаго; радуйся, разум богопросвещенный стяжавый. Радуйся, яко ухищрения и суесловия лжеучителей посрамил еси; радуйся, яко глаголы Жизни Вечныя в словесех Мудреца Истиннаго мудре уразумел еси. Радуйся, лучу Божественнаго света посреде тьмы лжеверия; радуйся, стено нерушимая посреде бури страстей языческих. Радуйся, Владимире, державы Русския прocветитeлю.

Кондак 3

Силою свыше умудрен, послал еси мужи избранныя во страны иныя, да видят и испытают, како инии народи служат Богу и како веру свою от дел своих показуют; тии же вся добре испытавше, достигоша Царьграда, идеже видяще благолепное совершение Божественнаго священнодействия, мнеша себе не на земли, но на Небеси стояти, и со умилением сердца воздаша хвалу Господеви, зовуще: Аллилуиа.

Икос 3

Имуще в сердцах своих твердое уверение, яко вера греко-восточная воистинну есть православная и яко священнодействия ея паче всех иных велелепна, послании тобою мужие, возвратившеся во Отечествие свое исповедаша сия пред лицем твоим и пред старейшины твоими, рекоша же: “Никтоже вкусив сладкаго, восхощет горькаго, тако и мы не можем паки остати зде и служити кумиром”. Яковое извещение прием, возгорелся еси ревностию по вере истинней. Сего ради величаем тя: Радуйся, гласу Божественныя благодати прилежно внимавый; радуйся, водительству Святаго Духа ycеpдно последствовавый. Радуйся, яко советники твоя умудрил еси; радуйся, вся люди твоя советы твоими ко истинней вере привел еси. Радуйся, яко со тщанием поискал еси добраго бисера Христа; радуйся, пчело трудолюбивая, мудре взыскавшая цветы, в них же сладкий мед истины и спасения. Радуйся, Владимире, державы Русския просветителю.

Кондак 4

Бурею сумнений и недоумений не поколебался еси повнегда уведети тебе веру истинную, православную, но абие восхотел еси прияти Святое Крещение со всею державою твоею, да купно с нею, яко отец со чады своими, достойно воспоеши Богу: Аллилуиа.

Икос 4

Слышавше боляре и старейшины яже о вере истинней, помянуша праматерь твою святую княгиню Ольгу, яже прият Святое Крещение в Цареграде, и рекоша: аще не бы блага бысть вера сия, не бы прияла ю сия мудрейшая в женах. Темже и мы, присно поминающе премудрую Ольгу, благодарственно зовем ти: Радуйся, яко соблюл еси Божественное семя, еже всея в сердце твое блаженная праматерь твоя; радуйся, яко святым заветам тоя последовал еси. Радуйся, яко провидел еси в ней зарю спасения народа твоего; радуйся, солнце возшедшее по заре той. Радуйся, свете, старейшины твоя просветивый; радуйся, вся люди твоя ко Христу приведый. Радуйся, Владимире, державы Русския просветителю.

Кондак 5

Боготканную одежду Святаго Крещения восхотев получити, помыслил еси, откуду и како имети имаши толик сонм пастырей и учителей, да просветят вся люди твоя с тобою, и како пояти себе жену, в вере святей испытанну, дому твоему благую строительницу, чадом твоим матерь во Христе, советницу же всем во благочестии, и о сем всем поревновав, дух твой приведе тя ко стране Гречестей, идеже вернии от лет древних благочестно воспевают Богу: Аллилуиа.

Икос 5

Видевше царие гречестии всю страну твою во тьме идолослужения коснящу, небрегоша тя, яко кумиром служаща, обаче побеждени бывше от тебе и уведевше крепкое изволение твое прияти Святое Крещение и вся люди твоя ко Христу привести, исполнишася радости и вдаша ти сестру свою Анну на брак, пастыри же и учители народу твоему. Темже и мы, присно радующеся святому сему союзу твоему, воспеваем тя: Радуйся, яко посетил есть тя Восток свыше; радуйся, яко звезда Всевышняго приведе тя к Востоку, идеже Премудрость созда себе дом и утверди столпов седмь, седмь Соборов Вселенских, иже утвердиша веру Христову по вселенней. Радуйся, яко сия есть вера апостольская, сия вера вселенную всю утверди; радуйся, яко от чистаго источника чистое учение Христово приял еси. Радуйся дому твоего и чад твоих добрый рачителю, радуйся, всего народа твоего премудрый наставниче. Радуйся, Владимире, державы Русския просветителю.

Кондак 6

Пастырие и учители, ихже приял еси, прехвальне княже, от царей греческих, яко да напаяют всю страну Русскую ученьми Божественными, со тщанием течаху на делание свое, благодарственно поюще призвавшему народ твой ко спасению Господу Богу: Аллилуиа.

Икос 6

Возсия пречудне чувственный свет в помраченною недугом слепоты очию твоею, в душе твоей свету благодати возсиявшу, егда, просветився Божественным Крещением, изшел еси от святыя купели, еже ощутив, радостно воскликнул еси: “ныне познах Бога Истиннаго”. Темже ублажаем тя: Радуйся, светильниче, огнем Божественныя благодати во тьме язычества возжженный; радуйся, благовестителю света Христова, омраченная очеса и сердца народа твоего отверзаяй. Радуйся, яко умною очию твоею провидел еси Божие смотрение о державе твоей; радуйся, яко до конца потщался еси, да и вси людие твои просветятся в нем. Радуйся, богосветлая главо князей Русских; радуйся, славнейшее украшение и похвало Церкве Христовы. Радуйся, Владимире, державы Русския просветителю.

Кондак 7

Хотя просветити Божественным Крещением народ русский, первее повелел еси креститися сыновом и вельможам твоим, да вси людие, последующе стопам их, со благим произволением приступят ко Святому Крещению, благочестно зовуще Богу: Аллилуиа.

Икос 7

Ново творение во Христе яви тя, по Святем Крещении, образ жития твоего: ревнитель бо первее быв идолослужения, последи выну по вере Христовой ревновал еси: возлюбил же еси кротость и милосердие, воздержание и целомудрие и все житие по заповедем Господним. Чудящеся убо благому пременению сему, благочестно зовем ти: Радуйся, яко росою Святаго Духа пламень страстей в себе угасил еси; радуйся, яко огнем Божественныя благодати вся помышления и вся чувствия твоя согрел еси. Радуйся, селения Господня, церкви святыя, паче всех селений земных, возлюбивый; радуйся, Божественныя службы и Христова учения паче всех деяний и учений взыскавый. Радуйся, образ новаго жития всем людем твоим в себе показавый; радуйся, сирых и убогих благий кормителю и попечителю. Радуйся, Владимире, державы Русския просветителю.

Кондак 8

Странное бе, купно же и радостотворное видение, егда тмочисленный сонм мужей и жен, юнош и дев, таже незлобивых младенец с радостию течаху к реце Днепру, якоже ко Иордану, идеже крещахуся во Имя Отца и Сына и Святаго Духа, иереом на брезе возносящим тайнодейственныя молитвы и воспевающим Господу песнь: Аллилуиа.

Икос 8

Весь был еси объят неизреченною радостию, достоблаженне княже, зря крещаемыя люди твоя, и во умилении сердца, воздав хвалу Спасителю Богу, усердно молил еси Его, да призрит на новопросвещенныя люди Своя, да утвердит их в вере и благочестии и да прославит Имя Свое в странах русских. Воспоминающе убо преславное и прерадостное сих сбытие, приносим ти благодарственныя и похвальныя песни сия: Радуйся, виновниче спасения безчисленных душ в земли Русской; радуйся, неоскудеваемый источниче благословений и милостей Божиих к народу твоему. Радуйся, благий вертоградарю, сад Божественныя веры в царстве твоем насадивый; радуйся, поточе сладости, напоивый водою благочестия люди русския. Радуйся, яко Божественную веру прославил еси, прелесть же идольскую посрамил еси; радуйся, яко Царь царей дарова тебе мудрость Соломонову, кротость Давидову, ревность Илиину, правоверие апостольское. Радуйся, Владимире, державы Русския просветителю.

Кондак 9

Все естество Ангелов, хранителей рода человеческаго, прослави тя, благоверный княже, егда повелел еси отцем и матерем вдаяти дети своя в учение книжное, да разумеют, яже веруют, и да познают, како житие свое добре по вере провождати. Темже и ныне призри на учащияся Божественным писанием, и на отцев и матерей их, пастырей же и учителей, споспешествующих им во учении, благослови, укрепи и настави я во трудех их, да возрастают в вере истинней и в добром житии, поюще Богу: Аллилуиа.

Икос 9

Вития многовещанныя не могут достойно изобразити величие благодеяний, дарованных тобою, княже, земли твоей: водворив бо в ней Божественную веру, избавил еси ю от мрака языческаго и вечныя погибели, открыл еси ей путь ко истинному просвещению, ко спасению и земному благоденствию. Сего ради со благодарением благочестно зовем ти: Радуйся, могущества и славы державы Русския основателю; радуйся, истиннаго просвещения и благочестия в ней насадителю. Радуйся, в народе твоем языческих суеверий и злых обычаев искоренителю; радуйся, идольских требищ и кумиров потребителю. Радуйся, святых храмов создателю; радуйся, равноапостольному царю Константину равночестный подобниче. Радуйся, Владимире, державы Русския просветителю.

Кондак 10

Спасти хотя от вечныя погибели царство твое, в бездне идолослужения гибнувшее, подъял еси велия труды и попечения, обходя грады и веси земли твоея и посылая повсюду пастыри духовныя, во еже Божественною верою Святым Крещением люди твоя просветити, и научити их Единому Истинному Богу пети: Аллилуиа.

Икос 10

Стена твердая был еси земли твоей во вся дни живота твоего противу врагов тоя и виновник благоденствия и славы ея; буди и ныне защитник необоримый от враг видимых и невидимых и помощник в нуждех и скорбех нам, с любовию вопиющим тебе: Радуйся, благопопечительнейший пастырю народа русскаго; радуйся, благострадательнейший отче сирых и страждущих. Радуйся, готовый споспешниче ищущих вечнаго спасения и истиннаго просвещения; радуйся, слава и радование державы Русския. Радуйся, присный помощниче в многотруднем деле народоуправлепия; радуйся, мощный споборниче в брани воинства русскаго. Радуйся, Владимире, державы Русския просветителю.

Кондак 11

Пение умиленное приими от нас, угодниче Божий, сокруши твоими молитвами вся враги наша, насади православную веру среди язык страны русския, неведущих истиннаго Бога, искорени в ней вся ереси и расколы, да сынове русские едиными усты и единым сердцем славят Бога, поюще Ему: Аллилуиа.

Икос 11

Светозарное светило, просвещающее сиянием своим страну русскую, ты еси достохвальне княже Владимире, разгоняя мрак идолослужения и показуя путь к истинному просвещению и небесному блаженству. Сего ради, прославляюще тя глаголем: Радуйся, звездо, просвещенная от незаходимаго Солнца Правды; радуйся, путеводителю, правую стезю к вечному спасению нам открывый. Радуйся, мощный споспешниче и укрепление проповедников православныя веры; радуйся, присный покровителю благих наставников юношества и всех благотрудящихся на пользу общую. Радуйся, скорый помощниче всех, к помощи твоей прибегающих; радуйся, яко всем усердно тя чтущим, благотворныя советы подаеши. Радуйся, Владимире, державы Русския просветителю.

Кондак 12

Благодать Пресвятаго Духа испроси нам, преблагий пастырю наш, от Всещедраго Бога и Спаса нашего, вразумляющую и укрепляющую нас в деле спасения, да не безплодна будет в нас насажденная тобою святая вера, но да уклоняющеся от путей нечестия и заблуждений, ходим во свете заповедей Божиих и достигнем вечнаго блаженства, воспевающе Богу: Аллилуиа.

Икос 12

Поюще твоя премногая и преславная благодеяния, явленная державе нашей в просвещении тоя светом Божественныя веры, купно же велия твоя труды и подвиги, во благоустроение ея подъятыя, усердно благодарим и восхваляем тя, с любовию зовуще: Радуйся, богоизбранне и богопрославленне самодержче земли Русския; радуйся, несокрушимое ограждение ея, покрове и защищение. Радуйся, райское древо, произрастившее две пречудныя отрасли, святых страстотерпцев Бориса и Глеба, радуйся, первостоятелю святых Русския Церкве. Радуйся, апостолов сопрестольниче и сликовствователю; радуйся, яко на землю Русскую выну призираеши благ временных и вечных ей у Бога ходатайствуеши. Радуйся, Владимире, державы Русския просветителю.

Кондак 13

О прехвальный и предивный равноапостоле, великий княже Владимире, приими милостивно от нас благодарение сие о всех, яже тобою воздаде Господь нам, отцем и праотцем нашим и всей державе Русской, начен от дне Крещения даже до сего часа, и моли Всеблагаго Бога пробавити милость Свою на ны и на роды родов наших, утвердити ны в правоверии и благочестии, хранити же от всех бед и зол, да сподобимся с тобою, якоже чада со отцем, во веки воспевати Богу: Аллилуиа.

(Этот кондак читается трижды, затем икос 1 и кондак 1)

Молитвы святому равноапостольному князю Владимиру

Молитва первая

О великий угодниче Божий, богоизбранный и богопрославленный, равноапостольный княже Владимире! Ты отринул еси зловерие и нечестие языческое, уверовал еси во Единаго Истиннаго Триипостаснаго Бога и, восприяв Святое Крещение, просветил еси светом Божественныя веры и благочестия всю страну Русскую. Славяще убо и благодаряще Премилосердаго Творца и Спасителя нашего, славим, благодарим и тя, просветителю наш и отче, яко тобою познахом спасительную веру Христову и крестихомся во Имя Пресвятыя и Пребожественныя Троицы: тою верою избавихомся от праведнаго осуждения Божия, вечнаго рабства диаволя и адова мучительства: тою верою восприяхом благодать всыновления Богу и надежду наследования Небеснаго блаженства. Ты еси первый вождь наш к Начальнику и Совершителю нашего вечнаго спасения Господу Иисусу Христу; ты еси теплый молитвенник и ходатай о стране Русской, о воинстве и о всех людех. Не может язык наш изобразити величие и высоту благодеяний, тобою излиянных на землю нашу, отцев и праотцев наших и на нас, недостойных. О всеблагий отче и просветителю наш! Призри на немощи наша и умоли премилосердаго Царя Небеснаго, да не прогневается на ны зело, яко по немощем нашим по вся дни согрешаем, да не погубит нас со беззаконьми нашими, но да помилует и спасет нас, по милости Своей, да всадит в сердце наше спасительный страх Свой, да просветит Своею благодатию ум наш, во еже разумети нам пути Господни, оставити стези нечестия и заблуждений, тщатися же во стезях спасения и истины, неуклоннаго исполнения заповедей Божиих и уставов Святыя Церкве. Моли, благосерде, Человеколюбца Господа, да пробавит нам великую милость Свою, да избавит нас от нашествия иноплеменных, от внутренних нестроений, мятежей и раздоров, от глада, смертоносных болезней и от всякаго зла, да подаст нам благорастворение воздуха и плодоносие земли, да даст пастырем ревность о спасении пасомых, всем же людем споспешение о еже усердно службы своя исправляти, любовь между собою и единомыслие имети, на благо же Отечества и Святыя Церкве верне подвизатися, да возсияет свет спасительныя веры в стране нашей во всех концех ея, да упразднятся вся ереси и расколы, да тако поживше в мире на земли, сподобимся с тобою вечнаго блаженства, хваляще и превозносяще Бога во веки веков. Аминь.

Молитва вторая

О великий угодниче Божий, равноапостольный княже Владимире! Призри на немощи наши и умоли Премилосердаго Царя Небеснаго, да не прогневается на ны зело и да не погубит нас со беззаконьми нашими, но да помилует и спасет нас по милости Своей, да всадит в сердца наша покаяние и спасительный страх Божий, да просветит Своею благодатию ум наш, во еже оставити нам стези нечестия и на путь спасения обратитися, неуклонно же заповеди Божия творити и уставы Святыя Церкве соблюдати. Моли, благосерде, Человеколюбца Бога, да явит нам великую милость Свою: да избавит нас от смертоносных болезней и от всякаго зла, да сохранит и спасет рабов Божиих (имена) от всех козней и наветов вражиих и да все мы сподобимся с тобою вечнаго блаженства, хваляще и превозносяще Бога во веки веков.

Тропарь равноапостольному князю Владимиру

Тропарь, глас 4

Уподобился еси купцу, ищущему добраго бисера, славнодержавный Владимире, на высоте стола сидя матере градов, богоспасаемого Киева, испытуя же и посылая к царскому граду уведети православную веру, и обрел еси бесценный бисер, Христа, избравшаго тя, яко втораго Павла, и оттрясшаго слепоту во святей купели, душевную вкупе и телесную. Тем же празднуем твое успение, людие твои суще: моли спастися державы твоея Российския начальником, Христолюбивому православному народу.

Кондак, глас 8

Подобствовав великому апостолу Павлу, в сединах, всеславне Владимире, вся, яко младенческая мудрования, яже о идолех тщания оставль, яко муж совершенный, украсился еси божественнаго крещения багряницею: и ныне Спасу Христу в веселии предстоя, моли спастися державы Российския начальником и множеству владомых.

Величание

Величаем тя, святый равноапостольный княже Владимире, и чтем святую память твою, идолы поправшаго и всю Российскую землю святым крещением просветившаго.

Акафист святой блаженной Ксении Петербургской

Кондак 1

Избранная угодница и Христа ради юродивая, святая блаженная мати Ксения, избравшая подвиг терпения и злострадания, хвалебное пение приносим ти, чтущия святую память твою. Ты же заступи нас от враг видимых и невидимых, да зовем ти: Радуйся, Ксения блаженная, молитвенница о душах наших.

Икос 1

Равноангельского жития взыскала еси, блаженная мати, по успении мужа твоего отвергла еси мира сего красоту и вся, яже в нем: похоть очес, похоть плоти и гордость житейскую, юродством разум Христов стяжала еси. Того ради услыши от нас похвалы, тебе возносимые: Радуйся, житием твоим Андрею, Христа ради юродивому равная; Радуйся, имени своего отрекшаяся, себе же умершей именовавшая. Радуйся, в юродстве имя мужа твоего Андрея принявшая; Радуйся, именем мужеским назвавшись, немощи женской отрешившаяся. Радуйся, все имение твое добрым людям и нищим раздавшая; Радуйся, нищету добровольную Христа ради приявшая. Радуйся, века сего суемудрия юродством твоим отвергатися нас научившая; Радуйся, благая утешительнице всех, в молитве к тебе прибегающих. Радуйся, Ксения блаженная, молитвенница о душах наших.

Кондак 2

Видя странное твое житие, яко ты презрела еси дом свой и всякое мирское богатство, родные по плоти безумной тя полагаху, людие же града Петрова, видя смирение твое, нестяжание и вольную нищету, воспели Богу: Аллилуиа.

Икос 2

Разум, от Бога тебе данный, ты, Ксения блаженная, в мнимом безумии скрыла еси; в суете града великого аки пустынница жила еси, молитвы Богу свои вознося непрестанно. Мы же, дивящеся таковому житию твоему, взываем тебе хвалебно: Радуйся, крест тяжкий юродства, от Бога тебе данный, на рама своя принявшая; Радуйся, мнимым безумием сияние благодати скрывавшая. Радуйся, дар прозорливости смирением крайним и подвигом молитвы стяжавшая; Радуйся, дар сей на пользу и спасение страждущих являвшая. Радуйся, страдания людския прозорливо в дали необозримей зревшая; Радуйся, жене доброй о рождении сына прорекшая. Радуйся, яко жене той у Бога чадо испросившая; Радуйся, всех к Богу в молитве прибегати научившая. Радуйся, Ксения блаженная, молитвенница о душах наших.

Кондак 3

Силою свыше, от Бога тебе дарованной, зной и люту стужу мужественно претерпевала еси, распиная плоть свою со страстьми и похотьми. Тем же Духом Святым просвещаемая, взывала непрестанно Богу: Аллилуиа.

Икос 3

Имея, о блаженная, небо покровом себе, землю же ложем своим, отвергла еси плотоугодие Царства Божия ради. Мы же, зряще таковое твое житие, со умилением зовем ти: Радуйся, жилище свое земное людям отдавшая; Радуйся, небесного крова взыскавшая и получившая. Радуйся, ничто же земное имущая, а всех духовно богатящая; Радуйся, житием своим терпению нас научающая. Радуйся, любовь Божию людям показующая; Радуйся, плодами благочестия украшенная. Радуйся, терпение и незлобие миру явившая; Радуйся, теплая предстательница наша пред престолом Всевышнего. Радуйся, Ксения блаженная, молитвенница о душах наших.

Кондак 4

Бурю житейскую, во граде Петрове мятущуюся, кротостию и незлобием преодолела еси, блаженная мати, бесстрастие же к тленному миру стяжала еси. Тем же и поеши Богу: Аллилуиа.

Икос 4

Слыша о тебе, яко ты, злостражда Христа ради, скорбных утешаеши, немощных укрепляеши, заблудших на путь правый наставляеши, людие страждущия к помощи твоей прибегаху, воспевающе тебе: Радуйся, путь Христов всем сердцем возлюбившая; Радуйся, крест Христов радостно понесшая. Радуйся, всякое поношение от мира, плоти и диавола претерпевшая; Радуйся, даров Божиих преисполненная. Радуйся, любовь к ближним явившая; Радуйся, страждущим людям утешение подававшая. Радуйся, слезу плачущих отиравшая; Радуйся, благодатию Духа Святаго чудесно согреваемая. Радуйся, Ксения блаженная, молитвенница о душах наших.

Кондак 5

Боготечной звездой явилася святость твоя, Ксения блаженная, осветившая небосклон града Петрова. Уже бо людем, гибнущим в безумии греха, ты явила путь спасения, всех к покаянию призывая, во еже вопити Богу: Аллилуиа.

Икос 5

Видя подвиги твоя в молитве, терпении хлада и зноя, благочестивые люди пытахуся умалити страдания твоя, одежду тебе и пищу приносяще. Ты же вся сия нищим раздавала еси, желая в тайне подвиг свой сохранити. Мы же, дивяся вольней нищете твоей, взываем ти сице: Радуйся, зной и стужу Христа ради добровольно терпевшая; Радуйся, в молитве непрестанно пребывавшая. Радуйся, град Петров всенощным бдением от бед ограждавшая; Радуйся, гнев Божий многажды от него отвращавшая. Радуйся, во все дни года ночами в поле молившаяся; Радуйся, сладость райскую в нищете духовной вкусившая. Радуйся, яко в сладости сей вся земная оставившая; Радуйся, яко вся в Боге пребывавшая. Радуйся, Ксения блаженная, молитвенница о душах наших.

Кондак 6

Проповедуют святость жития твоего, богоблаженная, вси избавленнии тобой от многоразличных болезней, бед и скорбей, богатии и убозии, старцы и юныя. Тем же и мы, прославляюще тя, Богу вопием: Аллилуиа.

Икос 6

Воссияла слава подвигов твоих, блаженная мати, егда ты нощию строителям церкви Смоленской камни тайно носила еси, облегчая делателей церковных. Сия ведуще, и мы грешнии зовем ти таковая: Радуйся, тайно творити добродетели нас научающая; Радуйся, к подвигам благочестия всех призывающая. Радуйся, строителям храмов Божиих помогающая; Радуйся, святость церковную возлюбившая. Радуйся, труды наши на пути спасения облегчающая; Радуйся, к тебе прибегающих скорая помощница. Радуйся, всем скорбящим благая утешительница; Радуйся, града Петрова небесная заступница. Радуйся, Ксения блаженная, молитвенница о душах наших.

Кондак 7

Хотя избавити от скорби плачущаго врача, жену хоронившего, ты повелела некоей девице на Охту бежати и тамо мужа себе обрести и утешити. И совершишася тако, якоже ты рекла еси. Они же в радости воспеша Богу: Аллилуиа.

Икос 7

Новое чудо в молитве своей показала еси ты, блаженная мати, егда рекла еси жене благочестивой: “Возьми пятак, потухнет”. Сим прорекла ей о пожаре дома ея. И по молитве твоей пламень огня угасе. Мы же, ведяще сия, вопием ти похвальная: Радуйся, скорби людские угашающая; Радуйся, дерзновение пред Богом за страждущих явившая. Радуйся, свеча неугасимая, в молитвах к Богу ярко горящая; Радуйся, предстательница наша в бедах и напастях. Радуйся, страстьми одержимых от гибели спасающая; Радуйся, благочестивых дев от брака неверного отвращающая. Радуйся, клеветою уязвленных от отчаяния избавляющая; Радуйся, на суде неправедном скорая защитница. Радуйся, Ксения блаженная, молитвенница о душах наших.

Кондак 8

Странницей бездомной прошла еси путь жизни твоей в стольном граде отечества нашего, в велицем терпении скорби и поношения неся. Ныне же в горнем Иерусалиме пребывая, в радости поеши Богу: Аллилуиа.

Икос 8

Всем вся была еси, Ксения блаженная: скорбящим утешение, немощным покров и защищение, печальным радование, нищим одеяние, болящим исцеление. Сего ради и вопием тебе: Радуйся, в горних, обителях пребывающая; Радуйся, о нас грешных тамо молящаяся. Радуйся, благий образ служения Богу явившая; Радуйся, униженных и гонимых покровительница. Радуйся, православный люд молитвами твоими заступающая; Радуйся, обидимых и молящихся тебе защищающая. Радуйся, обидящих вразумляющая; Радуйся, неверных и глумителей посрамляющая. Радуйся, Ксения блаженная, молитвенница о душах наших.

Кондак 9

Всякия претерпела еси болезни, блаженная мати, нищету телесную, глад и жажду, еще же и поношение от людей беззаконных, иже мняху тя безумной быти. Ты же, Господу моляся, выну взывала Ему: Аллилуиа.

Икос 9

Вития многовещанныя не могут разумети, како ты безумием своим безумие мира сего обличила еси и немощию своею посрамила еси крепкия и мудрыя. Не ведают бо в тебе Божией силы и Божией премудрости. Мы же, помощь твою получившия, поем ти таковая: Радуйся, Божественного Духа носительница; Радуйся, со апостолом Павлом немощию своею хвалившаяся. Радуйся, мнимым безумием своим мир обличившая; Радуйся, красоту века своего спасения ради отвергшая. Радуйся, небесная блага всем сердцем возлюбившая; Радуйся, на путь спасения нас призывающая. Радуйся, во грехе пьянства грозная обличительница; Радуйся, безмездным врачом и милостивым всем бывшая. Радуйся, Ксения блаженная, молитвенница о душах наших.

Кондак 10

Хотя спасти душу, ты плоть свою со страстьми и похотьми распяла еси и, невозвратно себя отвергши, крест свой на рама своя возложила еси и Христу всем сердцем последовала еси, поя Ему: Аллилуиа.

Икос 10

Стена еси твердая и прибежище необоримое явилась молящимся тебе, мати Ксения. Тем же заступай и нас от враг видимых и невидимых молитвами твоими, да зовем ти: Радуйся, на труд духовный нас воздвигающая; Радуйся, от сетей вражиих нас избавляющая. Радуйся, фимиам кадильный, Богу приносимый; Радуйся, мир Божий в сердца людей приносящая. Радуйся, дух злобы в сердцах озлобленных угашающая; Радуйся, детям благим благословение подающая. Радуйся, тайною молитвою их от болезней исцеляющая; Радуйся, миру озлобленному мудрость Божию явившая. Радуйся, Ксения блаженная, молитвенница о душах наших.

Кондак 11

Пение хвалебное приносят ти, Ксения блаженная, спасшиеся твоими молитвами от бед и скорбей, и всяких напастей, и купно с тобою радостно поют Богу: Аллилуиа.

Икос 11

Светозарным светом явилось житие твое, святая мати, во мраке жития сего освещающим люди. Ты бо падших из тины греха избавила еси и к свету Христову направила еси путь их. Тем же и зовем ти: Радуйся, православных людей Божиим светом просвещающая: Радуйся, Христова угодница, в мире надмирно пожившая. Радуйся, труды многими великую благодать стяжавшая; Радуйся, во тьме греха благодатию Божиею сиявшая. Радуйся, отчаявшимся на пути спасения руку помощи подающая; Радуйся, немощных в вере укрепляющая. Радуйся, духов злобы посрамляющая; Радуйся, житием своим ангелов удивившая. Радуйся, Ксения блаженная, молитвенница о душах наших.

Кондак 12

Благодать обильно источаеши, Ксения блаженная, на чтущих память твою и прибегающих к покрову твоему. Тем же и нам, тебе молящимся, источи от Бога струи исцеления, да зовем Ему: Аллилуиа.

Икос 12

Поюще многая чудеса твоя, блаженная мати, восхваляем тя и всеусердно молим, не остави нас грешных в скорбных обстояниях, но умоли Господа сил, да не отпадем от веры нашея православныя, в Нем же тобою утверждаеми зовем ти: Радуйся, сострадати страждущим нас научающая; Радуйся, немощи наша всеусердно врачующая. Радуйся, распинати плоть со страстьми и похотьми научающая; Радуйся, о чтущих память твою ходатаице и покровительнице. Радуйся, скорбный путь прошедшая; Радуйся, спасение вечное сим улучившая. Радуйся, ко гробу твоему притекающим отраду подающая; Радуйся, о спасении Отечества нашего присно ходатайствующая. Радуйся, Ксения блаженная, молитвенница о душах наших.

Кондак 13

О святая блаженная мати Ксение, в житии твоем крест тяжкий понесшая. Приими от нас, грешных, моление сие, к тебе приносимое. Огради нас молитвами твоими от наветов духов тьмы и всех, мыслящих нам злая. Умоли всещедрого Бога подати нам силу и крепость, да кийждо от нас возьмет крест свой и во след Христу грядет, поя Ему с тобою: Аллилуиа.

(Этот кондак читается трижды, затем икос 1 и кондак 1)

Молитвы к блаженной Ксении Петербургской

Молитва первая

О святая всеблаженная мати Ксение! Под покровом Всевышняго жившая, ведомая и укрепляемая Богоматерью, голод и жажду, холод и зной, поношения и гонения претерпевшая, дар прозорливости и чудотворения от Бога получила еси и под сенью Всемогущего покоишися. Ныне святая Церковь, яко благоуханный цвет, прославляет тя. Предстояще на месте твоего погребения, пред образом твоим святым, яко живей ти, сущей с нами, молимся ти: приими прошения наша и принеси их ко престолу милосерднаго Отца Небеснаго, яко дерзновение к Нему имущая, испроси притекающим к тебе вечное спасение, на благая дела и начинания наша щедрое благословение, от всяких бед и скорбей избавление. Предстани святыми твоими молитвами пред Всемилостивым Спасителем нашим о нас, недостойных и грешных. Помози, святая блаженная мати Ксение, младенцы светом святого крещения озарити и печатию дара Духа Святаго запечатлети, отроки и отроковицы в вере, честности, богобоязненности воспитати и успехи в учении им даровати; болящия и недугующия исцели, семейным любовь и согласие ниспосли, монашествующих подвигом добрым подвизатися удостой и от поношений огради, пастыри в крепости Духа Святаго утверди, народ и страну нашу в мире и безмятежии сохрани, о лишенных в предсмертный час причащения Святых Христовых Тайн умоли. Ты наша надежда и упование, скорое услышание и избавление, тебе благодарение воссылаем и с тобою славим Отца и Сына и Святаго Духа, ныне и присно, и во веки веков. Аминь.

Молитва вторая

О препростая образом жития своего, бездомная на земли, наследнице же обителей Отца Небеснаго, блаженная страннице Ксение! Якоже прежде к надгробию твоему недужнии и скорбнии припадавшии и абие утешениями исполняемии, сице ныне и мы (имена), обуреваемии тлетворными обстоянии, тебе прибегающе, с надеждою просим: помолися, благая небошественнице, дабы исправилися стопы наша по словеси Господню к деланию заповедей Его, и да упразднится богоборное безбожие, пленившее град твой и страну твою, повергающее нас, многогрешных, в смертное братоненавидение, гордое самовозбешение и хульное отчаяние. О, блаженнейшая Христа ради, посрамившая суемудрость века сего, испроси у Творца и Подателя всяческих благ даровати нам смирения, кротости и любве в сокровище сердца нашего, веры в укрепление молитвы, надежды в покаянии, крепости в многотрудном житии, милосерднаго исцеления души и тела нашего, целомудрия в супружестве и благопопечения о ближних и искренних своих, всего жития нашего обновление в чистительней бане покаяния, яко да всехвально воспевающе память твою, прославим в тебе чудодействующаго, Отца и Сына и Святаго Духа, Троицу Единосущную и Нераздельную во веки веков. Аминь.

Молитва третья

О преславная святая блаженная мати наша Ксение, теплая о нас пред Богом молитвеннице! Якоже прежде к надгробию твоему припадавшии, сице ныне и мы по прославлении твоем к мощем твоим прибегающе, просим: помолися Господу, да освятит наши души и телеса, да просветит ум, очистит совесть от всякия скверны, нечистых помыслов, лукавых и хульных умышлений и от всякаго превозношения, гордости же и кичения, высокоумия же и дерзости, от всякаго фарисейскаго лицемерия, и от всякаго студнаго и лукаваго обычия нашего; да дарует нам искреннее покаяние, сокрушение сердец наших, смиренномудрие, кротость же и тихость, благоговение, разум же духовный со всяким благоразумием и благодарением. Утаившая себе от мудрых века сего, но Богу знаемая, испроси же стране нашей Российстей от бед лютых избавление, всего нашего жития обновление и исправление, соблюди нас во всяком благочестивом православном исповедании веры христианския, яко да ублажающе тя сподобимся во вся дни воспевати, благодарити и славити Отца и Сына и Святаго Духа, Троицу Единосущную, Животворящую и Нераздельную во веки веков. Аминь.

Молитва четвертая

О святая угодница Божия блаженная Ксения! Призри милостиво твоим оком на нас, раб Божиих (имена), честной твоей иконе умильно молящиеся и просящие у тебе помощи и заступления. Простри ко Господу Богу нашему теплыя твоя молитвы и испроси душам нашим оставление прегрешений. Се бо мы сердцем сокрушенным, и духом смиренным тебе ходатаицу милостивую ко Владыце и молитвенницу за ны, грешныя, призываем, яко ты прияла еси от Него благодать молитися за ны и от бед избавляти. Тебе убо просим, не презри нас недостойных, молящихся тебе и твоей помощи требующих, и исходатайствуй всем вся ко спасению полезная, яко да твоими ко Господу Богу молитвами получивши благодать и милость прославим всех благих Источника и Дароподателя и Бога Единаго, в Троице Святей славимаго. Отца и Сына и Святаго Духа, ныне и присно и во веки веков.

Тропарь к святой блаженной Ксении Петербургской

Тропарь, глас 7

Нищету Христову возлюбивши, безсмертныя трапезы ныне наслаждаешися, безумием мнимым безумие мира обличивши, смирением крестным силу Божию восприяла еси. Сего ради дар чудодейственныя помощи стяжавшая, Ксение блаженная, моли Христа Бога избавитися нам от всякаго зла покаянием.

Кондак, глас 3

Днесь светло ликует град святаго Петра, яко множество скорбящих обретает утешение, на твоя молитвы надеющеся, Ксение всеблаженная, ты бо еси граду сему похвало и утверждение.

Величание

Величаем тя, святая блаженная мати наша Ксение, и чтим святую память твою, ты бо молиши за ны Христа Бога нашего.